​
​ខេត្តព្រះវិហារ ៖ តាម​ប្រភពពី​មន្ត្រីនគរបាល​បាន​ឲ្យ​ដឹងថា អ្នកកាសែត​ម្នាក់​ឈ្មោះ ប្រាក់ សុខុន អាយុ​៤៣​ឆ្នាំ មុខរបរ​មិន​ពិតប្រាកដ រស់នៅ​ភូមិ​កណ្តាល សង្កាត់​កំពង់ឆ្នាំង ក្រុង​កំពង់ឆ្នាំង ខេត្តកំពង់ឆ្នាំង បាន​អះអាងថា ខ្លួន​ជា​ចាងហ្វាង​កាសែត​កម្ពុជា​ម៉ែន ត្រូវបាន​សមត្ថកិច្ច​ឃាត់ខ្លួន នៅ​ទីរួមស្រុក​គូ​លេន ខេត្តព្រះវិហារ នៅ​ព្រឹក​ថ្ងៃទី​៩ ខែឧសភា ឆ្នាំ​២០១៦​នេះ តាម​ដីកា​បង្គាប់ លេខ​១៤៨/១១ ចុះ​ថ្ងៃទី​១៨ ខែតុលា ឆ្នាំ​២០១១ របស់លោក ទៀង សុថា អតីត​ចៅក្រម​ជំនុំជម្រះ​សាលាដំបូង​ខេត្តកំពង់ឆ្នាំង ពីបទ​លួច​ដោយ​ហិង្សា និង​គំរាមកំហែង​យក ប្រព្រឹត្តទៅ​នៅ​ភូមិ​ឈូក​ក្រញាស់ ឃុំ​ឈូកស ស្រុក​កំពង់ត្រឡាច ខេត្តកំពង់ឆ្នាំង កាលពី​ថ្ងៃទី​២៩ ខែតុលា ឆ្នាំ​២០០៨  ។​

​មកដល់ពេលនេះ អ្នកកាសែត​ឈ្មោះ ប្រាក់ សុខុន ត្រូវបាន​សមត្ថកិច្ច​ស្នងការដ្ឋាន​នគរបាល​ខេត្តព្រះវិហារ ប្រគល់​ខ្លួន​ទៅ​ស្ថាប័ន​តុលាការខេត្ត​កំពង់ឆ្នាំង​វិញ ដើម្បី​អនុវត្ត​នីតិវិធី​បន្តទៀត ។ សូមបញ្ជាក់ថា នៅ​ព្រឹក​ថ្ងៃ​ដដែល​នេះដែរ តាម​ប្រភពព័ត៌មាន​ឲ្យ​ដឹងថា សមត្ថកិច្ច​បាន​ឃាត់ខ្លួន​អ្នកកាសែត​ចំនួន​៦​នាក់​ទៀត នៅ​ស្រុក​គូ​លេន សង្ស័យ​ពាក់ព័ន្ធ​នឹង​ករណី​គំរាមកំហែង​យក ។ រហូតមកដល់​ពេលនេះ យើង​មិនទាន់​ទទួលបាន​ព័ត៌មាន​ច្បាស់​ពី​សមត្ថកិច្ច​នៅឡើយ​ទេ ខណៈ​នេះ​សមត្ថកិច្ច​កំពុង​សាកសួរ​នៅ​អធិការដ្ឋាន​នគរបាល​ស្រុក​គូ​លេន និង​រងចាំ​ទទួល​ព័ត៌មាន​នៅពេល​ក្រោយ ៕

​